नयाँ मौलिक तीज गीत "रातो चुरा रातै सारी" सार्वजनिक

हरितालिका तीज नेपाली हिन्दु महिलाहरूको आस्था, श्रद्धा, प्रेम र संस्कृतिसँग गहिरो रूपमा जोडिएको पर्व हो। भगवान शिव र पार्वतीको पवित्र मिलनको स्मरणमा मनाइने यस पर्वमा विवाहित महिलाहरूले श्रीमानको दीर्घायु, सुख–समृद्धि तथा पारिवारिक कल्याणको कामना गर्दै व्रत बस्ने गर्छन् भने अविवाहित युवतीहरूले योग्य जीवनसाथी प्राप्तिको कामना गर्ने परम्परा रहेको छ। तीज केवल धार्मिक पर्व मात्र नभई विवाहित चेलीहरू आफ्ना माइतीसँग पुनर्मिलन गर्ने, दुःख–सुख साट्ने, नाचगान गर्ने तथा पारिवारिक र सामाजिक सम्बन्धलाई अझ सुदृढ बनाउने सांस्कृतिक अवसरका रूपमा पनि परिचित छ।

यही पर्वको अवसर पारेर गायिका उषा गजुरेलको नयाँ मौलिक तीज गीत “रातो चुरा रातै सारी” सार्वजनिक गरिएको छ।

तीज गीत नेपाली लोकसंस्कृतिको महत्वपूर्ण सम्पदा मानिन्छ। परम्परागत रूपमा यस्ता गीतहरूले विवाहपछि चेलीले भोग्ने सुख–दुःख, माइतीप्रतिको माया, सामाजिक यथार्थ, महिला अधिकार, पारिवारिक सम्बन्ध तथा समाजका विविध पक्षलाई भावपूर्ण ढंगले अभिव्यक्त गर्दै आएका छन्। समयसँगै तीज गीतको विषयवस्तु र प्रस्तुति परिवर्तन हुँदै गए पनि मौलिक तीज गीतहरूले नेपाली पहिचान, संस्कार र परम्परालाई पुस्तान्तरण गर्न महत्वपूर्ण भूमिका खेलिरहेका छन्।

“रातो चुरा रातै सारी” गीतमा उषा गजुरेलकै शब्द, सङ्गीत र स्वर रहेको छ। म्युजिक भिडियोको निर्देशन मिरक लिङ्दोम लिम्बुले गरेका छन् भने कोरियोग्राफी सुरेश पाण्डेको रहेको छ। भिडियोमा अभिनेत्री एलिना रायमाझीको आकर्षक अभिनयले गीतलाई अझ जीवन्त र प्रभावशाली बनाएको छ।

नेपाली मौलिक संस्कृति र तीजको परम्परागत भावनालाई केन्द्रमा राखेर तयार गरिएको यस गीतले नेपाली समाजको यथार्थ चित्रण गर्ने प्रयास गरेको छ। गीतमा अन्तरजातीय विवाहप्रति समाजमा अझै विद्यमान सोच र त्यससँग जोडिएका भावनात्मक पक्षलाई संवेदनशील ढंगले प्रस्तुत गरिएको छ। साथै, विवाहपछि चेलीले आफ्नो माइतीप्रति राख्ने अथाह माया, सम्झना र भावनात्मक सम्बन्धलाई हृदयस्पर्शी रूपमा अभिव्यक्त गरिएको छ।

परम्परागत तीजको लय, भाका र मौलिक शैलीमा तयार पारिएको “रातो चुरा रातै सारी” ले नेपाली संस्कृतिको संरक्षण र प्रवर्द्धनमा योगदान पुर्‍याउने विश्वास गरिएको छ। पछिल्ला वर्षहरूमा आधुनिक शैलीका तीज गीतहरूको संख्या बढ्दै गए पनि यो गीतले मौलिकता, सांस्कृतिक सन्देश र नेपालीपनलाई प्राथमिकतामा राख्दै दर्शक तथा श्रोतामाझ फरक पहिचान बनाउन सफल हुने अपेक्षा गरिएको छ।

“रातो चुरा रातै सारी” on Youtube https://youtu.be/ief2Rn1gciE?si=k76y7wOzspm6yvBW